Bilbo eta Bizkaiko diseinuaren eta sormenaren alorretako eragileekin batera biltzeko arratsaldea. Elkarrekin ekosistemaren entzumen aktiboko prozesua martxan jartzeko aukera bat, aurten ERRESONANTZIArekin batera proposatu dena. Datozen hamar egunetan izango dugun jarduera-programaz gozatzen hasteko gonbidapen bat. Harreman sinbiotikoak eta mutualistak izateko prest egoten lagunduko digun topaketa, harreman horiek sormen-arloen artekoak izan zein beste alor ekonomiko eta sozialekin izan.
BELARRIREKIArekin hasteko zentzumen-esperientzia batean murgilduko gara Rubén Rámilaren eskutik. Hitzaldi nagusian, Amalio Reyk diseinua eta sormena taldeko adimeneko ariketa gisa azalduko dizkigu, testuinguruaren eta ekosistemaren entzumen sakona, indibiduala beharrean, kolektiboa, polifonikoa eta oihartzun komun baten iturria den heinean. Lau kasuren bidez tokiko ekosistemako profesionalen esperientzien aniztasunaren oihartzuna entzuteko aukera izango dugu: Maraka taldeak bere erabiltzaileei entzutea proposatuko digu; Mutur Beltzeko Laurita Silesekin ingurunean jarriko dugu arreta; Cala Creative Studioko Paula Cabok materialek esaten digutena ulertzen lagunduko digu, eta Sara Lenziren eskutik soinua bera nola diseinatzen den entzungo dugu. Apitropikeko Alex Filiatreauk Disoinua Nolako soinua du diseinuak? proiektua aurkeztuko digu. BIDCk (Bilbao Bizkaida Design Council) produzitu duen ikerketa/erakusketa da, diseinua nola ulertzen dugun ezagutzeko egindakoa, jakiteko kalean nola bibratzen duen, pertsonek euren eguneroko ingurunean nola sentitzen duten. Gainera, aurkezleak publikoaren iritziak ezagutzeko parte hartzeko jarduera bat proposatuko digu. Bukatzeko, Arte Ederretako fakultateko Eskultura eta Arte eta Teknologia Saileko 4. mailako ikasleek berariaz egindako lana aurkeztuko digu Mikel Arcek, Soinu espazioa eta instalazioak izenekoa, egunean zehar Kupula Aretoan ikusgai egongo dena. Hori guztia Vanessa Sánchezen konpainiarekin, zeinak saioa bideratuko baitu. Gainera, 20:00etatik eta 21:30era bitartean, harremanetan egoteko, elkarri entzuteko eta pixka bat gehiago nahasteko tarte bat izango dugu.
Zelan jo dizu honek guztiak belarrira?
Animatuko zara?
Kokapena
Hizlariak
- Rubén Rámila
- Amalio Rey
- MARAKA
- Laurita Siles
- Paula Cabo Lalanne
- Sara Lenzi
- Apitropik
- Mikel Arce
- Vanessa Sánchez
SAKON ENTZUTEKO ASMOZ ZENTZUMENAK ZABALDUZ
BBDW22ren hasierako preludioa eta interludioa izango diren bi zentzumen-esperientzia. «Unibertsoaren sonifikazioa» astrofisikaren alorreko pertsona itsuen talde batek landu duen kontzeptu bat da, eta horren bidez itxuraz hain zabala eta isila dugun espazioari soinua jartzeko modua aurkitu dute. Horren inguruko ariketa bat ekarriko digu Rámilak. Eta, horrez gain, sensologian eta garuneko hemisferioen arteko banaketan oinarritutako beste jarduera bat egongo da, memoria fisikoaren eta sentsorialaren artekoa, intelektuala denaren eta gorputzaren artekoa. Erresonantzia kolektiborako aurrez prestatzeko bi modu.
Rubén Rámila gizarte-hezitzailea, antropologoa eta zentzumen-zientzietan aditua da. Bere lana diseinuaren eta irisgarritasunaren ingurukoa da, eta museoetan zein ikusmen-desgaitasuna duten pertsonei bideraturiko erakusketetan zentratzen da batez ere, beste zentzumenak erabiltzearen garrantzia azpimarratuz.
ADIMEN KOLEKTIBOA ETA DISEINUA, JOAN-ETORRIKO HARREMAN BAT
Mundua gero eta konplexuagoa da, eta konplexutasun horri heltzeko ezinbestekoak dira ko-sorkuntza eta koprodukzioa, eragile anitzak inplikatuz eta talentu antolatuaz baliatuz. Alabaina diseinu-prozesuak oraindik oinarritzen dira kontrolarekin arduratsuak diren logika bertikaletan, bai enpresa askotan, bai erakunde publikoetan. Horrek asko zailtzen du adimen kolektiboak ustekabeko kontuei, kontu esperimentalei eta suspertzen ari direnei erantzuteko ematen dituen abantailez baliatuz diseinatzea.
Hitzaldian Amalio Reyk diseinuaren eta adimen kolektiboaren arteko joan-etorriko harremanei buruz hitz egingo digu: nola adimen kolektiboak diseinua adierazgarriagoa, egiazkoagoa eta gogobetegarriagoa izan dadin lagun dezakeen, eta nola diseinua gai den partaidetzako arkitektura eta adimen kolektiboaren emaitza eraginkorragoak eta txeratsuagoak izan daitezen laguntzeko.
Amalio Rey El Libro de la Inteligencia Colectiva liburuaren egilea da. Aditu ospetsua adimen kolektiboren eta berrikuntzaren kudeaketaren alorretan. Ikertzailea, hezitzailea, artisau-kontsultaria eta hizlaria da, partaidetzako arkitekturen eta horien hobekuntza eraginkorrean aditua. Bere burua partaidetza-prozesuen bideratzaile gisa definitzen du. Berrikuntzako ekosistemak sortzen lagundu du, bai Espainian, bai Latinoamerikako herrialde askotan. Gogoetak,esperientziak eta ezagutza bi blogetan partekatzen ditu: bata pertsonala, amaliorey.com, eta bestea adimen kolektiboaren ingurukoa, bloginteligenciacolectiva.com. Honako hau da bere Twittereko kontua: @arey.
ELKARREKIN DISEINATZEKO GURE ERREZETA
Marakan, proiektuak diseinatzen ditugunean kontuan hartzen ditugu testuinguru zehatz bakoitzaren errealitatea eta beharrizanak. Hori lortzeko pertsonengan zentraturiko diseinu-metodologiak baliatu eta horiek gure osagaiekin konbinatzen ditugu: ingurumenarekin enpatia dugu, aniztasuna entzuteko, elkarrekin diseinatzeko eta esperimentatzeko asmoz ikuspegia zabalduz. Enpatia, bitartekaritza, sormena, balioak eta kultura dira gure lanaren oinarriak, eta horien bidez gure ingurua etorkizun jatorrago eta jasangarriagoetarantz bideratzen saiatzen gara.
Marakan erakunde publikoek eta enpresek bideratu beharreko errealitate berrietarako erantzunak diseinatzen ditugu. Diseinua aplikatzen dugu, errealitate berriak eraldatuz erakundeetarako eta erabiltzaileentzako baliotsuak diren berrikuntza-aukerak sortzeko. Hori lortzeko erabiltzaileei buruzko ezagutza sakona, elkarren arteko diseinua, ikuspegi estrategikoa eta etorkizunen ikuspuntua konbinatzen dituen berrikuntza-prozesu bat baliatzen dugu. Marakan uste dugu egun diseinuak izan behar duen eginkizunik garrantzitsuenetariko bat etorkizun jasangarriak eraikitzen laguntzea dela, eta horren alde egiten dugu
SORMEN-ESPERIENTZIATIK ABIATUTA BASERRI-EREDU BERRIAK BIRPENTSATZEA
Hitzaldia Mutur Beltz proiektuan sormen-esperientziatik abiatuta baserri-eredu berriak birpentsatzearen ideiaren inguruan dugun eginkizun ikertzaile, pedagogiko eta dibulgatzailearen barnean dago.
Karrantzako ardia sustatzeko bizi-proiektu bat da Mutur Beltz, ardi-espezie hori, artzaintza bera bezalaxe, desagertzeko arriskuan baitago. Bizkaian dagoen Karrantza Haraneko tokiko ekimen horrek ezagutza horiek desagertu ez daitezen lagundu nahi du agroekologiatik, artetik eta diseinutik abiatuta. Gure helburuetako bat ardi horien artileak lehengai gisa duen balioa berreskuratzea da, eta modu horretan ingurumen-inpaktua txikiagotzea. Tokiko ondarearen kontserbazioan eta berritzean parte hartuz ezagutzak, ofizioak eta teknika jasangarriak ahalduntzeko asmoz.
Topaketa honetan gure Mutur Zapatak aurkezteko aprobetxatuko dugu: gure ardien artileaz egindako etxeko txapinen edizio mugatua.
Laurita Siles 1981n Marbellan jaiotako artista eta ikertzailea da. Cum laude doktorea 2017an Euskal Herriko Unibertsitatean. Lurraldearekiko kezka bizia du, besteak beste, ingurumen-krisiari zein sustraien galerak eragindako nostalgiari dagokienez. Egun Karrantzan (Bizkaian) bizi da, Mutur Beltz proiektuko kide fundatzaileetako bat da eta «Mutur beltz - sorgin baserria» jardueran dihardu sorkuntza, diseinu, kultur kudeaketa eta etxeko lanen alorretan. Askotariko jarduerak egin ditu, banakakoak zein taldekoak, munduko zenbait lekutan: erakusketak, ekintzak, proiekzio bisualak edota hitzaldiak, adibidez.
IKUSPEGI BERRIAK, ETORKIZUN JASANGARRI BATERAKO MATERIALEN BERRIKUNTZA ETA CMF-A (COLOUR, MATERIAL, FINISH)
Hitzaldian, Cabok oraingoz sektore askotan aski ezezagunak diren CMF Design delakoaren diziplinak aurkeztuko dizkigu. Koloreari, materialari eta akaberei loturiko estrategiak garatzeaz arduratzen den alorra da, eta hizlariak azalduko digu nola diziplina horrek sortzen duen materialen berrikuntzaren bidez gure produktuen eta barrualdeen jasangarritasuna hobetzeko enpresa-estrategiak garatu daitezkeen.
Paula Cabo Lalanne CMF Designen espezializatutako produktu-diseinatzailea da. CMF Designer den heinean, estrategia estetiko berriak sortzen ditu materialen eta ehunen berrikuntzaren bidez. Aditua da kolorearen eta jasangarritasunaren alorretan, eta etorkizuneko proiektuen eta barrualdeen diseinu bisualean zein ukimen- eta dekorazio-diseinuan egiten du lan.
ELKARRI ENTZUTEA ELKAR ULERTZEKO: SOINUA GIZA ADIMENEN ETA ADIMEN ARTIFIZIALEN ELKARRIZKETA GISA
Konturatu ala ez, gero eta gehiago jotzen dugu adimen artifizialeko sistemetara. Sistema horiek datu-kopuru itzela biltzen eta interpretatzen dute, eta haien laguntzagatik ez balitz ezinezkoa litzateke datu horiek kudeatzea. Gure banakako egunerokoan zein kolektiboan eragin handia dute. Alabaina, nola komunikatzen gara adimen artifizial horiekin? Badugu haien adimenaz fidatzerik? Interneteko sareak, akueduktuak, zibersegurtasuna eta oihan tropikaletako soinuak nahasten dituzten kasuen bidez, entzungo dugu nola soinuak gizakiei erabakiaren gaineko erantzukizuna berreskuratzen lagundu diezaiekeen.
Sara Lenzik bi hamarkadetako eskarmentua du soinu-diseinuan. Murgiltze- eta produktu-esperientziak sortu ditu enpresa batzuetarako: Ducati, BMW, Singapurko Aireportua, Citibank eta Art Science Museum Singapore, besteak beste. Entzutearen garrantziaren aldeko ekintzailea da, eta 2018tik ikerketa-lanetan aritu da gehienbat. Politecnico di Milano-n egin zuen Diseinuko Doktoregoa, eta egun ikertzailea da Delfteko Unibertsitate Teknikoko Human Centered Design sailean, Herbehereetan. Bilbon antolatutako Design Research Society Conference 2022 programaren zuzendaritza-taldean izan da, eta Data Sonification Archive delakoaren sortzaileen artean dago.
DISOINUA - NOLAKO SOINUA DU DISEINUAK?
BBDW22-o programazioan tarte bat eskaini zaio Bilbon diseinuak zer soinu duen deskubritzeko, kalean nola bibratzen duen jakiteko eta pertsonek euren eguneroko ingurunean nola sentitzen duten ezagutzeko eremu-azterketari. Horretarako, Wallapop plataforman «diseinua» hitza duen iragarkiren bat argitaratu duten zenbait pertsona elkarrizketatu dituzte, baita karteletan hitz hori bera erabiltzen duten zenbait saltoki ere, ulertzeko haientzat diseinua zer den, nola bizitzen duten eta nola definitzen duten. Prozesu horren bidez Metro Bilboko Abando geltokian ikusgai egongo den erakusketa egingo da azaroaren 10etik 27ra. Erakusketa hirian «diseinua» idazten eta saltzen duten pertsonek partekatutako istorioz eta gogoetaz osatuta egongo da. Aurreratzen dizuegu bakoitzak aparteko ikuspegia duela diseinuari buruz. Eta zuk? Zein da zure ikuspegia?
Apitropik-en esploratzaile enpatikoak, geldiezinak eta grinatsuak gara, diseinu-prozesuetan eta pertsonengan zentraturiko berrikuntzan adituak.
Pertsonak estrategiaren erdigunean jarriz etorkizuna diseinatzen laguntzen diegu erakundeei. Planetan eta pertsonengan eragin positiboa izango duten konponbideak bilatzen, elkarrekin sortzen eta diseinatzen laguntzen diegu prozesu eraldatzaile, oroigarri eta gizatiarren bidez.
ERRESONANTZIAK IRUDIKATZEA
Hurbilketa txiki bat soinuaren eta soinua entzutearen, erresonantzien eta oihartzunen espazio- eta dimentsio-irudikapenetara. Kupula Aretoan entzun eta sentitu ahal izango diren eta EHUko Arte Ederren Fakultateko Eskultura eta Arte eta Teknologia Saileko 4. mailako ikasleek BELARRIREKIArentzat ex profeso egin dituzten pieza esperimentalak kokatzeko modu bat.
Mikel Arce artista da, Arte Ederretan doktorea EHUn eta irakaslea Arte Ederren Fakultatean, besteak beste, Instalazioak eta Soinu Espazioa irakasgaian. BBDW22an parte hartuko du bere ikasleekin. Soinu-artearen alorrean egiten du lan, soinuaren espazio- eta dimentsio- propietateak aztertuz eta horiekin esperimentatuz.
Vanessa Sánchez Goñi kazetaria eta albistegi-aurkezlea da, eta hogei urteko eskarmentua du EITBko korrespontsal gisa Parisen eta Pekinen. Txinan zegoenean bere sustraiekin berriz bat egiteko eta beste alor batean hutsetik ekiteko beharra sentitu zuen. Etxera bueltan, Walk on the Basque Side sortu zuen gida pribatu gisa Euskal Herria erakusteko. Egiten dituen ibilbideen artean Lasierrakoa dago, bizitoki duen Arabako herrixka, herritarren iniziatibagatik eraberritu izanari esker bizirik dirauena. 2021ean, adibidez, energia garbia sortzeko eta kudeatzeko Euskadiko lehenengo komunitate energetikoa sortu zuten.
Antolatzailea
Kolaboratzaileak
